بلو ٹوتھ کے ذریعے ہیکنگ کا خطرہ آپ کی کار کو بھی ہو سکتا ہے

بلوٹوتھ آن ہونے سے ہیکنگ کے خطرات — Image captionیہ حملہ فون کے علاوہ ٹی وی اور لیپ ٹاپ کو بھی متاثر کر سکتا ہے

سکیورٹی کمپنی ارمس کے محققین نے ایک ایسے میل ویئر کا پتہ لگایا ہے جو بلو ٹوتھ سے منسلک آلات پر حملہ کر سکتا ہے۔

کمپنی کے مطابق موبائل فونز کا بلو ٹوتھ آن رکھنا خطرناک ثابت ہو سکتا ہے۔

یہ حملہ صرف سمارٹ فون کو ہی نہیں بلکہ سمارٹ ٹی وی، ٹیبلیٹ، لیپ ٹاپ، لاؤڈ سپیکرز اور گاڑیوں کے آڈیو سسٹم کو بھی متاثر کر سکتا ہے۔

خیال رہے کہ دنیا بھر میں اربوں ڈیوائسز ایسی ہیں جن پر بلو ٹوتھ کا استعمال ہوتا ہے۔

Image captionکچھ ہیکنگ حملوں کے لیے ہیکرز کا ڈیوائس کے قریب ہونا ضروری ہوتا ہے

اس میل ویئر کا نام ‘بلو بارن‘ ہے۔ اس کے ذریعے ہیکرز ان آلات تک رسائی حاصل کر سکتے ہیں جن کا بلو ٹوتھ آن ہو۔ ایسا ہونے سے آپ کے موبائل کا ڈیٹا بڑی آسانی سے چوری کیا جا سکتا ہے۔

ارمس کا کہنا ہے کہ ‘بلو ٹوتھ ڈیوائس سے جڑے کئی اور ایسے نقصان دہ سافٹ ویئر ہو سکتے ہیں جن کی شناخت ہونا باقی ہے۔‘

Image captionبلو ٹوتھ سے متعلق حملوں کے ذریعے میسجز، فون بک اور تصاویر بھی چرائی جا سکتی ہیں

خطرناک میلویئر اور ان کے حملے

بلو بگنگ

اس نقصان دہ سافٹ ویئر کی مدد سے حملہ آور ڈیٹا چوری کرنے کے لیے ڈیوائس میں وائرس بھیج سکتا ہے۔

بلو بارن صارفین سے کسی بھی لنک پر کلک کرنے کے لیے نہیں کہتا ہے بلکہ کسی بھی ایکٹیو بلو ٹوتھ والی ڈیوائس کو قابو میں کرنے کے لیے اسے صرف دس سکینڈ کی ضرورت ہوتی ہے۔

ارمس نے ایک ایسی ایپلیکیشن تیار کی ہے جو یہ پتا لگا سکتی ہے کہ آپ کی ڈیوائس محفوظ ہے یا نہیں۔ اس ایپ کا نام ‘بلو بارن ولنریبلٹی سکینر‘ ہے۔

بلو جیکنگ

دوسرا خطرہ ہے بلو جیکنگ۔ یہ بلو ٹوتھ سے جڑی کئی ڈیوائسز کو ایک ساتھ سپیم بھیج سکتا ہے۔

یہ میل ویئر وی کارڈ (پرسنل الیکٹرانک کارڈ) کے ذریعے میسیج بھیجتا ہے جو کہ ایک نوٹ یا کانٹیکٹ نمبر جیسا ہو سکتا ہے۔ عام طور پر یہ بلو ٹوتھ ڈیوائس کے نام سے سپیم بھیجتا ہے۔

بلو سنارفنگ

یہ بلوجیکنگ سے زیادہ خطرناک ہے۔ اس کے ذریعے بھی معلومات کی چوری کی جاتی ہے۔ اس کا استعمال زیادہ تر فون بک اور ڈیٹا چرانے کے لیے کیا جاتا ہے۔

اس کے ذریعے تصاویر بھی چرائی جا سکتی ہیں، لیکن اس کے لیے ہیکر کا صارفین کے قریب دس میٹر کے دائرے میں ہونا ضروری ہے۔